Հայաստանի կինեմատոգրաֆիստների միության նոր նախագիծը՝ ԿԻՆՈԵՐԿԽՈՍՈՒԹՅՈՒՆԸ, Կինոյի տուն էր բերել շուրջ 100 ստեղծագործող երիտասարդի, որոնք իրենց ապագան այս կամ այն կինոմասնագիտությամբ կապում են կինոյի հետ:

 

Երեք երիտասարդ ռեժիսորներ Մանե Բաղդասարյանը, Մանե Գիրգորյանը և Մարիամ Եգորյանը ներկայացրել էին իրենց ֆիլմերը, որոնց շուրջ դիտումից հետո պետք է կայանար խոսակցություն կինոռեժիսոր Մհեր Մկրտչյանի, կինօօպերատոր Վահագն Տեր-Հակոբյանի ու դերասան, սցենարիստ Արշո Հարությունյանի մասնակցությամբ:

 

Այս նախագիծը նպատակ ունի երիտասարդ կինոռեժիսորների ֆիլմերը քննարկել փորձառու մասնագետների հետ, խոսել կինոյի, կինոմտածողության մասին, մասնագիտորեն գնահատել, քննարկել երիտասարդների ֆիլմերը:

 

Այն կարծես ոչ ֆորմալ կինոդպրոց երևույթն է կրում իր մեջ, որտեղ կարծիքների ու տեսակետների ազատ քննարկման, պրոֆեսիոնալ, ազատ, բաց, անկեղծ խոսակցության միջոցով հնարավոր է դառնում սերունդների երկխոսությունը:

 

Այս նախագծի հույժ կարևորությունն ընդգծվեց հենց ավելի քան 100 երիտասարդների մասնակցությամբ առաջին հանդիպմանը, որին հիմնական «ընդդիմախոսներից» ներկա էին նաև այլ հայտնի կինոռեժիսորներ, կինոօպերատորներ, սցենարիստներ և այլն:

 

Հանդիպումը վկայությունն էր այն բանի, այստեսակ խոսակցությունը շատ երկար սպասված էր և բանական էր, որ այն պետք է կայանար հենց Կինոյի տանը:

 

Շուրջ երեք ժամ Կինոյի տան «Բուխարու սրահ»-ում չդադարեցին կարծիքների ու տեսակետների բախումները: